ALLAHIN VƏSFLƏRİ

İSTƏDİYİNİ EDƏNDİR

2010-10-16T00:14:00.000-07:00

Rəbbinin istədiyi istisna olmaqla, göylər və yer durduqca onlar orada əbədi qalacaqlar. Həqiqətən, Rəbbin istədiyini edəndir.

(Hud Surəsi, 107)

Özlərini təmizə çıxaranları görmürsənmi? Xeyr. Allah istədiyini təmizə çıxardar və onlara xurma çərdəyindəki nazik tel qədər zülm olunmaz!

(Nisa Surəsi, 49)

Həqiqətən, Allah iman gətirib yaxşı işlər görənləri altından çaylar axan cənnətlərə daxil edər. Şübhəsiz ki, Allah istədiyini edər.

(Həcc Surəsi, 14)

Rəbbiniz sizi çox yaxşı tanıyır. İstəsə, sizə rəhm edər, istəsə, sizə əzab verər. Biz səni onlara vəkil göndərməmişik.

(İsra Surəsi, 54)

Məgər bilmirsən ki, göylərin və yerin hökmü Allaha məxsusdur?! O, istədiyinə əzab verər, istədiyini bağışlar. Allah hər şeyə qadirdir!

(Maidə Surəsi, 40)

Ayələrimizi yalan sayanlar qaranlıqlar içində karlar və lallardır. Allah istədiyini azdırar, istədiyini isə düz yola yönəldər. (Ənam Surəsi, 39)

“Əgər Allah sizi azdırmaq istəyirsə, mən sizə nəsihət vermək istəsəm belə nəsihətim sizə fayda verməz. O sizin Rəbbinizdir və Ona da qaytarılacaqsınız”.

(Hud Surəsi, 34)

İstəyənlər ondan öyüd alıb düşünər. Allah istəməsə, onlar əsla öyüd ala bilməzlər. Qorxub çəkinməyə layiq olan da, bağışlamağa qadir olan da Odur!

(Müdəssir Surəsi, 55-56)

HƏR ŞEYƏ QADIRDIR

2010-10-16T00:00:00.000-07:00

Siz ikiqat müsibət gətirmiş olduğunuz halda, başınıza bir müsibət gəldiyi zaman: “Bu, haradan gəldi?”– söylədiniz. De ki: “Bu, sizin özünüzdəndir!” Həqiqətən, Allah hər şeyə qadirdir.

(Ali-İmran Surəsi, 165)

Göylərin və yerin qeybi Allaha aiddir. O Saatın gəlməsi bir göz qırpımı kimidir və ya daha tezdir. Həqiqətən, Allah hər şeyə qadirdir.

(Nəhl Surəsi, 77)

İldırımın çaxması az qalır ki, onların gözlərinin işığını alsın. Onlara işıq verdiyi zaman yeriyirlər, üzərlərinə qaranlıq çökdükdə isə dayanıb dururlar. Əgər Allah istəsəydi, onların qulaqlarını və gözlərini əllərindən alardı. Həqiqətən, Allah hər şeyə qadirdir.

(Bəqərə Surəsi, 20)

Hər kəsin üz tutduğu bir qibləsi vardır. Yaxşı işlər görməkdə bir-birinizlə yarışın. Harada olursunuz olun Allah sizin hamınızı (bir yerə) toplayacaqdır. Şübhəsiz ki, Allah hər şeyə qadirdir.

(Bəqərə Surəsi, 148)

Göylərdə və yerdə nə varsa, (hamısı) Allaha məxsusdur. Siz ürəyinizdə olanı zahirə çıxarsanız da, çıxarmasanız da, Allah ona müvafiq sizinlə haqq-hesab çəkər. (Allah) istədiyini bağışlar, istədiyinə də əzab verər. Allah hər şeyə qadirdir!

(Bəqərə Surəsi, 284)

Allah, Ondan başqa ilah yoxdur, (əbədi) Yaşayandır, (bütün yaratdıqlarının) Qəyyumudur. O nə mürgü, nə də yuxu bilər. Göylərdə və yerdə nə varsa (hamısı) Onundur. Allahın izni olmadan Onun hüzurunda kim şəfaət edə bilər? O, bütün yaranmışların keçmişini və gələcəyini bilir. Onlar Allahın elmindən Onun Özünün istədiyindən başqa heç bir şey qavraya bilməzlər. Onun kürsünü göyləri və yeri əhatə etmişdir. Bunları mühafizə etmək Onun üçün heç də çətin deyildir. Ən uca, ən böyük varlıq da Odur!

(Bəqərə Surəsi, 255)

Əgər yer üzündəki bütün ağaclar qələm olsaydı, dəniz də (mürəkkəb olub) ardından ona yeddi dəniz də qatılsaydı, yenə də Allahın sözləri (yazmaqla) tükənməzdi. Həqiqətən, Allah Qüdrətlidir, Müdrikdir.

(Loğman Surəsi, 27)

Göyləri, yeri və onlarda yaydığı canlıları yaratması Onun dəlillərindəndir. (Allah) istədiyi vaxt yaratdıqlarını bir yerə toplamağa qadirdir.

(Şura Surəsi, 29)

HƏR ŞEYI ƏHATƏ EDƏNDIR

2010-10-04T15:35:00.000-07:00

Şərq də, Qərb də Allahındır! Hansı səmtə yönəlsəniz, Allahın Üzü orada olar. Həqiqətən, Allah (hər şeyi) Əhatəedəndir, Biləndir.

(Bəqərə Surəsi, 115)

Göylərdə və yerdə nə varsa, hamısı Allaha məxsusdur. Allah hər şeyi əhatə edir. (Nisa Surəsi, 126)

Onlar insanlardan gizlədir, Allahdan isə gizlətmirlər. Halbuki onlar (Allahın) razı qalmadığı sözləri gecələr xəlvətdə söylədikləri vaxt belə, O, onların yanında olur. Allah onların nə etdiklərini əhatə edir.
(Nisa Surəsi, 108)

“Sizin tanrınız ancaq O Allahdır ki, Ondan başqa heç bir tanrı yoxdur. O, elm ilə hər şeyi əhatə edir.” (Taha Surəsi, 98)

Bil ki, onlar öz Rəbbi ilə qarşılaşacaqları barədə şəkk-şübhə içindədirlər. Bil ki, O, hər şeyi əhatə edir. (Fussilət Surəsi, 54)

O dedi: “Ey qövmüm! Məgər mənim qəbiləm sizin üçün Allahdan da əzizdir? Siz Onu saymayıb unutdunuz. Şübhəsiz ki, Rəbbim sizin nə etdiklərinizi əhatə edir.” (Hud, 92)

Bax belə! Biz onun başına gələnlərin hamısını büsbütün əhatə etmişdik.
(Kəhf Surəsi, 91)

Bir zaman Biz sənə: “Rəbbin insanları əhatə etmişdir”– demişdik. (Meracda) sənə göstərdiyimiz mənzərəni və Quranda lənətlənmiş ağacı insanlar üçün yalnız bir imtahan etdik. Biz onları qorxuduruq, bu isə onlarda ancaq böyük bir azğınlığı daha da artırır. (İsra Surəsi, 60)

Yeddi göyü və yerdən də bir o qədərini yaradan Allahdır. Vəhy onların arasında ona görə nazil olur ki, Allahın hər şeyə qadir olduğunu və Allahın hər şeyi elmi ilə əhatə etdiyini biləsiniz.
(Talaq Surəsi, 12)

QƏDƏRİ MÜƏYYƏN EDƏNDİR

2010-10-04T15:18:00.000-07:00

Şübhəsiz ki, Biz hər şeyi qədər ilə yaratdıq.

(Qəmər Surəsi, 49)

Yer üzündə baş verən və sizin başınıza gələn elə bir müsibət yoxdur ki, Biz onu yaratmamışdan əvvəl o, bir kitabda yazılmamış olsun. Şübhəsiz ki, bu, Allah üçün çox asandır. (Hədid Surəsi, 22)

BÜTÜN İŞLƏR AXIRDA ALLAHA QAYIDIR

2010-10-02T22:28:00.000-07:00

Yoxsa onlar Allahın (əzabının) bulud kölgələri içində mələklərlə gəlməsini və işin tamam olmasını (özlərinin məhv edilməsini) gözləyirlər? Şübhəsiz ki, bütün işlər Allaha qayıdacaqdır. (Bəqərə Surəsi, 210)

Sonra onlar Allaha – özlərinin həqiqi Himayədarına qaytarılacaqlar. Bilin ki, hökm yalnız Ona məxsusdur və O, ən tez haqq-hesab çəkəndir. (Ənam, 62)

Göylərdə və yerdə nə varsa, Allaha məxsusdur və axırda (bütün) işlər Allaha qaytarılacaqdır.

(Ali-İmran Surəsi, 109)

Yaxşı əməl sahibi olub özünü Allaha təslim edən şəxs ən möhkəm dəstəkdən yapışmış olar. Bütün işlərin sonu Allaha qayıdır. (Loğman Surəsi, 22)

O gün duracaq (pənah aparılacaq) yer ancaq Rəbbinin hüzurudur! (Quyamət Surəsi, 12)

Göylərin və yerin qeybi Allaha məxsusdur. Bütün işlər axırda Ona (Allaha) qayıdacaqdır. Elə isə yalnız Ona ibadət et və yalnız Ona təvəkkül et. Rəbbin nə etdiklərinizdən xəbərsiz deyildir.

(Hud Surəsi, 123)

BÜTÜN VARLIQLAR ONA BAŞ ƏYMİŞDİR

2010-07-29T08:27:00.000-07:00

“Yoxsa onlar Allahın dinindən başqa bir din axtarırlar? Halbuki göylərdə və yerdə olan hər bir məxluq istər-istəməz Ona təslim olmuş və Ona da qaytarılacaqlar.” (Ali İmran Surəsi, 83)

“Mən özümün və sizin Rəbbiniz olan Allaha təvəkkül etdim. Elə bir canlı yoxdur ki, (Allah) onun kəkilindən tutmuş olmasın. Həqiqətən, Rəbbim düz yoldadır!” (Hud Surəsi, 56)

“Biz dağları ona ram etmişdik. Onlar axşam-səhər onunla birlikdə (Allahı) təqdis edib şəninə təriflər deyərdilər.” (Sad Surəsi, 18)

“Rəbbinin dəvətini qəbul edənlər üçün ən gözəl nemət hazırlanmışdır. Onun dəvətini qəbul etməyənlərə gəlincə, yer üzündə olan (var-dövlətin) hamısı, üstəlik bir o qədəri də onların olsaydı, (əzabdan qurtarmaq üçün) onu mütləq fidyə verərdilər. Onlarla dəhşətli bir haqq-hesab çəkiləcəkdir. Onların sığınacaqları yer Cəhənnəmdir. Ora nə pis yataqdır!” (Rad Surəsi, 18)

“Ona görə ki, onları minəsiniz, sonra minib oturduğunuz zaman Rəbbinizin nemətini yada salaraq deyəsiniz: “Bunları bizə ram edən Allah pakdır, müqəddəsdir! (Əgər Allahın köməyi olmasaydı) bizim onlara gücümüz çatmazdı.”

(Zuxruf Surəsi, 13)

“Gəmilərin Onun əmri ilə dənizdə üzməsi və sizin də Onun lütfündən axtarmanız üçün dənizi sizə ram edən Allahdır! Bəlkə, şükür edəsiniz”

(Casiyə Surəsi, 12)

ONDAN BAŞQA QÜVVƏT YOXDUR

2010-07-26T12:35:00.000-07:00

“Bu ona görə idi ki, elçiləri onlara açıq-aydın dəlillər gətirdikləri halda, onlar inkar edirdilər. Buna görə də Allah onları (əzabla) yaxaladı. Həqiqətən, O, Qüvvətlidir, cəzası da şiddətlidir.” (Mümin Surəsi, 22)

“Məgər onlar yer üzündə dolaşıb özlərindən əvvəlkilərin axırının necə olduğunu görmürlərmi? Halbuki onlar bunlardan daha qüvvətli idilər. Göylərdə və yerdə Allahı aciz edə biləcək heç bir şey yoxdur. Həqiqətən, O (hər şeyi) biləndir, (hər şeyə) qadirdir!” (Fatir Surəsi, 44)

“Ad (xalqına) gəlincə, onlar yer üzündə haqsızcasına təkəbbür göstərib: “Bizdən daha qüvvətli kim ola bilər?”– dedilər. Məgər onları yaradan Allahın onlardan daha qüvvətli olduğunu görmürdülərmi? Onlar ayələrimizi, sadəcə, inkar edirdilər.”
(Fussilət Surəsi, 15)

“Biz elçilərimizi aydın dəlillərlə göndərdik və onlarla birlikdə Kitab və tərəzi nazil etdik ki, insanlar ədalətli olsunlar. Biz özündə çox böyük qüvvə və insanlar üçün mənfəətlər olan dəmiri də endirdik ki, Allah, (Onu) görmədən Ona və elçilərinə kömək göstərənləri üzə çıxartsın. Həqiqətən, Allah Qüvvətlidir, Qüdrətlidir.” (Hədid Surəsi, 25)

“Allah (əzəldən) belə yazmışdır: “Mən və elçilərim hökmən qalib gələcəyik!” Həqiqətən, Allah Qüvvətlidir, Qüdrətlidir.” (Mücadilə Surəsi, 21)

“İnsanlardan elələri də vardır ki, Allahdan qeyrilərini (Ona) tay tutur, onları da Allahı sevdikləri kimi sevirlər. İman gətirənlərin isə Allaha olan sevgisi daha güclüdür. Kaş zülm edənlər əzabı gördükləri zaman bütün qüdrət və qüvvətin Allaha məxsus olduğunu və Allahın şiddətli əzab verdiyini görəydilər.”

(Bəqərə Surəsi, 165)

Onların sözləri səni kədərləndirməsin. Çünki qüdrət bütünlüklə Allaha məxsusdur. O, Eşidəndir, Biləndir. (Yunus Surəsi, 65)

HƏR ŞEYİ YARADANDIR

2010-07-23T06:38:00.000-07:00

“O, göyləri və yeri icad edəndir. Onun zövcəsi olmadığı halda övladı necə ola bilər? Hər şeyi O xəlq etmişdir. O, hər şeyi bilir.”

(Ənam Surəsi, 101)

“Sizi xəlq etdik, sonra sizə surət verdik, sonra da mələklərə: “Adəmə səcdə edin!”– dedik. İblisdən başqa (hamısı) səcdə etdi. O, səcdə edənlərdən olmadı.”

(Əraf Surəsi, 11)

“Göylərin və yerin səltənəti Ona məxsusdur. O, Özünə oğul götürməmişdir və səltənətində də şəriki olan yoxdur. O, bütün şeyləri xəlq etmiş və onlara münasib bir biçim vermişdir.”

(Furqan Surəsi, 2)

“Məgər onlar görmürlər ki, göyləri və yeri yaradan Allah onlar kimisini də yaratmağa qadirdir? Allah onlar üçün (elə) bir əcəl müəyyən etmişdir ki, ona heç bir şəkk-şübhə yoxdur. Zalımlar isə küfrdən başqa bir şey qəbul etmədilər.”

(İsra Surəsi, 99)

“Sözünüzü gizli saxlasanız da, onu açıq desəniz də, (Allah) kökslərdə olanları bilir. Yaradan Lətif və Xəbərdar olduğu halda, ola bilərmi ki, O, bilməsin?”

(Mülk Surəsi, 13-14)

“Məgər kafirlər göylərlə yer bir olduğu zaman Bizim onları bir-birindən araladığımızı, hər bir canlını sudan yaratdığımızı görmürlərmi? Yenədəmi inanmırlar?” (Ənbiya Surəsi, 30)

“Axı sizi də, sizin düzəltdiklərinizi də Allah yaratmışdır.”

(Səffat Surəsi, 96)

BÜTÜN İŞLƏRİ İDARƏ EDƏNDİR

2010-07-20T23:55:00.000-07:00

“Gördüyünüz göyləri dirəksiz yüksəldən, sonra da ərşə ucalan, müəyyən vaxta qədər hərəkət edən günəşi və ayı (əmrinə) tabe edən Allahdır. O, işləri yoluna qoyur və ayələrini izah edir ki, bəlkə Rəbbinizlə qarşılaşacağınıza yəqinliklə inanasınız.”

(Rad Surəsi, 2)

“O, göydən yerə qədər olan bütün işləri idarə edir. Sonra sizin saydığınızın min ilinə bərabər olan bir gündə Ona doğru yüksələr.”

(Səcdə Surəsi, 5)

QƏLBLƏR ONUN NƏZARƏTİNDƏDİR

2010-07-20T23:28:00.000-07:00

“Allah onların qəlblərini və qulaqlarını möhürləmiş, gözlərinə də pərdə çəkmişdir. Onlar üçün böyük bir əzab vardır.” (Bəqərə Surəsi, 7)

“Onlar bağladıqları əhd-peymanı pozduqlarına, Allahın ayələrini inkar etdiklərinə, peyğəmbərləri haqsız yerə öldürdüklərinə və: “Qəlblərimiz qapalıdır!”– demələrinə görə (lənətə düçar edildilər). Xeyr, küfrləri üzündən Allah onların qəlblərini möhürləmişdir. Onların yalnız az bir hissəsi iman gətirir.”

(Nisa Surəsi, 155)

“Bunlar o kəslərdir ki, Allah onların qəlbinə, qulaqlarına və gözlərinə möhür vurmuşdur. Onlar əsl qafildirlər.” (Nəhl Surəsi, 108)

“Anlamasınlar deyə, onların qəlblərinə pərdə çəkib qulaqlarına əngəl qoyduq. Sən Quranda Rəbbinin Tək Allah olduğunu yada saldığın zaman onlar nifrət edərək arxalarını çevirib gedərlər.” (İsra Surəsi, 46)

“Yoxsa onlar: “O, Allaha qarşı yalan uydurdu”– deyirlər? Əgər Allah istəsə, sənin qəlbinə möhür vurar. Allah batili silib yox edər və haqqı Öz sözləri ilə bərqərar edər. Şübhəsiz ki, O, kökslərdə olanları Biləndir.”

(Şura Surəsi, 24)

“Allah istəməsə, siz istəyə bilməzsiniz. Həqiqətən, Allah biləndir, hikmət sahibidir!”(İnsan Surəsi, 30)

“Nəfsinin istəyini ilahiləşdirən şəxsi gördünmü? Allah elmi sayəsində onu azğınlığa saldı, qulağını və qəlbini möhürlədi, gözünə də pərdə çəkdi. Allahdan başqa kim onu doğru yola yönəldə bilər? Məgər düşünüb ibrət almırsınız?”

(Casiyə Surəsi, 23)

ONDAN BAŞQA İLAH YOXDUR

2010-07-19T01:27:00.000-07:00

“Sizin ilahınız Tək olan İlahdır. Ondan başqa ilah yoxdur, Mərhəmətlidir, Rəhmlidir.” (Bəqərə Surəsi, 163)

“Allah Özündən başqa tanrının olmadığına şahidlik etdi, mələklər və elm sahibləri də (şahidlik etdilər). (Allah əbədi olaraq) ədalətli olmaqdadır. Ondan başqa ilah yoxdur, Qüdrətlidir, Müdrikdir.”

(Ali- İmran Surəsi, 18)

Allah belə buyurdu: “İki ilah qəbul etməyin. O (Allah) yalnız tək bir İlahdır. Ancaq Məndən qorxun!” (Nəhl Surəsi, 51)

“De: “O Allah Təkdir!”” (İxlas, 1)

“O, Allahdır. Ondan başqa (ibadətə layiq olan) məbud yoxdur. Əvvəldə də, axırda da həmd Ona məxsusdur. Hökm Onundur və siz Ona qaytarılacaqsınız.”

(Qəsəs Surəsi, 70)

Allahın Vəsfləri

2010-07-19T00:58:00.000-07:00

“O, Özündən başqa heç bir məbud olmayan, qeybi və aşkarı Bilən Allahdır. O Mərhəmətlidir, Rəhmlidir. O, Özündən başqa heç bir məbud olmayan, Hökmran, Müqəddəs, Pak, (haqqı) təsdiq edən, (hər şeyi) müşahidə edən, Qüdrətli, Qadir, Məğrur Allahdır. Allah onların Ona şərik qoşduqlarından ucadır. O, Xaliq, yoxdan Yaradan, Surətverən Allahdır. Ən gözəl adlar yalnız Ona məxsusdur. Göylərdə və yerdə olanların hamısı Onun şəninə təriflər deyir. O, Qüdrətlidir, Müdrikdir.”

(Həşr Surəsi, 22-24)